發生mash

終於搞清楚三條路線係點行喇，大致心裡都有個(okay模糊嘅)譜。

【關於技術方面既描述，未必完全準確，一黎我有可能誤會或記錯左師父既意思，二黎始終要以當時交通狀況為準】

考牌官上車位置：對住油塘駕駛考試中心嘅嘉榮街。

油塘路線1(鯉魚門道)：(1)嘉榮街開車，(2)右轉入欣榮街，右轉入茶果嶺道，(3)右轉入高超道，(4)迴旋處左轉入鯉魚門道，燈位右轉入高超道，右轉入高超徑，(5)三手窄路掉頭，(6)出番黎左轉上斜，(7)斜路起步，(8)左轉入碧雲道，右轉入高超道，落斜，迴旋處轉入高超道，(9)左轉入欣榮街，右轉入嘉榮街番考試中心。(***補充︰我2015.07.10 15:30考呢條線，係入高超徑做三手窄路掉頭之前，考牌官示意我喺上斜轉彎位做斜路起步。)

油塘路線2(高超道)：(1)嘉榮街開車，(2)右轉入欣榮街，右轉入茶果嶺道，(3)右轉入高超道，(10)迴旋處轉上去，繼續高超道，(7)斜路起步，(11)繼續高超道，右轉入高超徑，(5)三手窄路掉頭，(12)出番黎右轉落斜，左轉入鯉魚門道，迴旋處右轉入高超道，(9)左轉入欣榮街，右轉入嘉榮街番考試中心。

油塘路線3仁宇圍：(1)嘉榮街開車，(13)右轉入欣榮街，左轉入茶果嶺道，落斜，左轉入鯉魚門徑，(5)窄路掉頭，(14)左轉入崇信街，右轉入仁宇圍，左轉入崇信街，上茶菓嶺道，(7)斜路起步，(3)右轉入高超道，(15)迴旋處轉入高超道，(9)左轉入欣榮街，右轉入嘉榮街番考試中心。

(1) 油塘三條路線開頭都一樣，都係嘉榮街開車。呢個位置好多死車，隻腳要隨時擺喺brake。如果兩邊都有死車，中間勉勉強強得一個車位過，就油都唔踩，仍然唔夠慢既話，就踩少少brake，好慢好慢咁駛過個狹小空間。之後落斜位，打右燈出番去欣榮街，出路口前要停一停(推一波，搵磨擦點)。由於有好多重型車死車，會block左左邊視線，要慢慢趷出去(點都好，首先要停左喺雙虛線後面，唔好掂到條線)。趷之前要望左邊有冇車黎緊，同時要兼顧有冇行人攝出黎。

其實喺落斜個陣、去到讓路位前，考牌官會示意「路口右轉再左轉」(仁宇圍路線，落工廠區)或者「路口右轉再右轉」(高超道路線或鯉魚門路線道都係咁樣行)。

(2) 考牌官示意「路口右轉再右轉」。啱啱開始出，一路趷一路右轉，個頭都要擰下左睇下有冇車黎緊，跟住望番前面，睇下有冇死車。如果冇死車，就行番右線既中間。如果有死車，就唔好咁貼近d死車(留番足夠開車門既空間)，踩住少少白線行，差唔多過到最後一部死車就打右燈，過晒就望鏡擰頭，然後扭軚行番中間(此時行緊欣榮街)。

到讓路位前減慢車速，望下左右有冇車(好有可能又有大車block視線)。如果冇，可以唔洗停，好smooth咁慢慢出。如果是旦一邊有車黎緊都要停低(推一波，搵磨擦點)，再望左望右(兩邊都要望)，clear就可以慢慢行出大路。一路出一路望住右邊睇下有冇車黎緊，出到近你個條線既一半就可以加快少少轉埋個彎(唔好阻住兩條行車線咁耐)。轉晒彎之後就可以加油轉二波(此時行緊茶果嶺道)。

(3) 燈位前會經過安全島及黃格(兩者之間距離一個車位)。望遠d睇埋燈號，評估下過唔過到黃格(千祈唔好停左喺黃格入面，少少都唔得)。如過到黃格就繼續行，再評估過唔過到燈位。如過路到黃格，就停喺安全島及黃格之間既車位。如果呢個位有車停緊，就直情停喺安全島後面，留番個位比行人過安全島(此時行緊茶果嶺道)。

到安全島咁上下，考牌官示意「燈位右轉」。記住打右燈。如果係一波行車，就轉埋個彎轉二波(此時行緊高超道)。

(4) 大約到巴士站咁上下，考牌官示意「迴旋處左轉」。首先拎番條左線，打左燈，過左巴士站前既雙白線位，就望鏡擰頭，扭軚過左線，然後會見到安全島。如果d人唔行出黎，就定住油門過安全島，跟住就係迴旋處。

就到迴旋處打左燈(因為係入完迴旋處後第一個路口出番去)，減慢車速。如clear就可定住油門行入迴旋處。如半個迴旋處有車，就要停低(推一波，搵磨擦點，記住千祈唔好出左界)，等到clear再入迴旋處。入既時候望一望右邊，睇下有冇車埋黎。一出迴旋處就打右燈搵機會拎番右線，望中鏡睇有冇車，clear就望右鏡擰頭拎番右線。本身一波行車就轉番二波，過左巴士總站(?)個燈位就可轉三波。如呢個燈位要停就推一波，搵磨擦點，開番車就轉二波，行一陣再轉三波。

下一個燈位前考牌官示意「燈位右轉」。打右燈，差唔多到燈位就轉二波，再右轉上斜。如要等燈都要轉左二波先右轉上斜。高超道上緊斜，考牌官示意「左轉入前面路口」。打左燈，轉彎前減慢車速，印住少少brake轉彎入高超徑。

(5)考牌官示意「喺適當既位置停低，做三手軚掉頭」。踩極力子踩brake停車，拉手掣，入空波。(喺高超徑掉頭，唔好停得太前，愈前d位愈窄。喺鯉魚門徑掉頭，可能前後都有車，咁停既位置就係車頭同隔離線架死車隔半個車位距離停低。)

準備好就做第一手，打右燈，入一波，搵磨擦點兼踩brake，望左右鏡，鬆手掣，慢慢放brake，快手d向右扭盡軚，到某個位就回軚，然後落番深d個brake停車，拉手掣，入空波。

跟住就係第二手，打左燈，入後波(R波)，搵磨擦點兼踩brake，望左右鏡及擰頭望後面，鬆手掣，慢慢放brake，快手d向左扭盡軚，到某個位就回軚，然後落番深d個brake停車，拉手掣，入空波。做完第二手架車應該對住前面鐵絲網少少向右，咁樣第三手應該唔會有大問題。如果此時架車呈90度，就麻煩d，有機會要扭死軚(即係架車唔郁，但照扭軚)。如果此時架車向左，就好risky，一定要扭死軚。

最後就係第三手，打右燈，入一波，搵磨擦點兼踩brake，望左右鏡，鬆手掣，慢慢放brake，快手d向右扭盡軚，架車慢慢入番條行車線，要快手回軚，唔好過左隔離線。

(6)做完窄路掉頭，考牌官示意「左轉出番大路」。打左燈，望右睇下有冇車上黎，clear就一路出一路扭軚。好多時成排成死喺度，就要打右燈，望鏡擰頭扭軚(記住！記住！記住！擰完頭先好扭軚)。好多時會做完窄路掉頭考牌官會示意停埋一邊做斜路起步，所以可以keep住行一波先。考牌官會示意某個位置停低做斜路起步，例如「過左巴士站停低」或「停喺架貨車後面」。打左燈望鏡擰頭扭軚，踩極力子踩brake停埋一邊，拉手掣，入空波。

(7) 入一波，搵磨擦點(上斜所以要高少少)，打右燈，望右鏡(如望唔清就望埋中鏡及左鏡)，擰頭，clear就扭軚行番條線中間。

(8)考牌官示意「燈位右轉(少少左轉再右轉)」。唔洗等燈既話應該係二波過燈位，如果係一波過燈位，就上到斜路最高點轉二波。落車轉彎位印少少brake，此時前方好多時有死車。對面線冇車黎緊既話，就打燈望鏡擰頭扭軚過死車。對面線有車黎既話，就要睇下架停緊死車既行車線有幾闊。條線夠兩架車過，就可以慢慢咁行，過左死車再打番右燈。條線唔夠兩架車過，就停低(推一波，搵磨擦點)，等到對面線冇車先行。

落斜期間都有機會有死車，記住打燈望鏡擰頭扭軚，同埋唔好咁接近物體先扭軚。

就到迴旋處，考牌官示意「迴旋處番試場」。打左燈，印住brake落斜到讓路位。迴旋處clear既話唔洗停，慢慢行入迴旋處。有車既話就停低(推一波，搵磨擦點)，clear再行。

(9)定住油門出迴旋處，轉二波，左轉入欣榮街(好大機會有行人過馬路，要慢，腳要隨時擺brake)。打右燈，右轉入嘉榮街(好大機會有行人過馬路，要慢，腳繼續擺brake)。如果d人就黎過完馬路，就試下印少少brake，睇下捱唔捱得住，捱唔住就轉一波(架車會慢d)，再捱唔住就停低比d人過左先。過左d人過馬路既位，腳可以擺番油門，轉番二波，慢慢行，再左轉番到考試中心，考牌官示意某個位停車，佢示意完成考試後，就熄匙(向左擰)，然後入一波。

(10) 大約到巴士站咁上下，考牌官示意「迴旋處直上高超道」。首先拎番條左線，打左燈，過左巴士站前既雙白線位，就望鏡擰頭，扭軚過左線，然後會見到安全島。如果d人唔行出黎，就定住油門過安全島，跟住就係迴旋處。

就到迴旋處打右燈，減慢車速。如clear就可定住油門行入迴旋處。如半個迴旋處有車，就要停低(推一波，搵磨擦點，記住千祈唔好出左界)，等到clear再入迴旋處。入既時候望一望右邊，睇下有冇車埋黎。入左迴旋處過左第一個路口就打左燈示意要出迴旋處。出左迴旋處上斜，考牌官會示意某個位置停低做斜路起步，例如「水龍頭停低」或「停喺架小巴後面」(此時行緊高超道)。打左燈望鏡擰頭扭軚，踩極力子踩brake停埋一邊，拉手掣，入空波。

(11)一路上斜好可能有死車，記住做足打燈望鏡擰頭扭軚成套動作。上斜上到咁上下條路係左灣，跟住個灣位繼續行，經過巴士站，前方有燈位。過左燈位同右邊條線合番埋一齊，理論上你綠燈行車個陣，另一條線係紅燈，唔會有車出黎，但都要打右燈，望鏡擰頭先好扭軚。跟住一路落斜，考牌官示意「前面路口右轉(入高超徑)」。打右燈，印住少少brake落。如對面線冇車上緊黎，就慢慢印住個brake扭軚轉入去高超徑。如對面線有車上緊黎，就停低(推一波，搵磨擦點)，clear先好轉入去。扭軚方面，角度盡量貼近直角，以架車行喺兩條線既時間盡量小為佳。

(12)做完窄路掉頭，考牌官示意「右轉出番大路」。打右燈，望右睇下有冇車上黎，冇就再望左睇下有冇車落黎，clear就行出去，出到上斜個條線既一半就開始扭軚，轉晒彎就轉二波。落斜既左彎要印住個brake(唔好放brake)，考牌官示意「燈位左轉」。打左燈，一路落睇下咩燈(個燈比較快轉紅)，如行得，就印住個brake落埋斜再定住油門轉彎。如未行得，就踩深少少個brake，踩埋極力子停車，拉手掣，入空波，到行得都係定住油門轉彎。

之後係大直路，轉三波行車。落迴旋處時印住個brake轉番二波，考官示意「迴旋處番試場」。就到迴旋處打右燈，減慢車速。如clear就可定住油門行入迴旋處。如半個迴旋處有車，就要停低(推一波，搵磨擦點，記住千祈唔好出左界)，等到clear再入迴旋處。入既時候望一望右邊，睇下有冇車埋黎。之後打左燈出迴旋處。

(13) 考牌官示意「路口右轉再左轉」。一路趷一路望下左邊，出左差唔多一半先右轉，個頭都要擰下左睇下有冇車黎緊。跟住打左燈，印住讓路位前轉二波，印住個brake到讓路位，望下右邊有冇車落緊黎。如clear就唔洗停，慢慢印住個brake左轉落斜。如有車落緊黎就停喺讓路位(推一波，搵磨擦點)，等到clear先出去。落緊斜考牌官示意「前面路口左轉(入鯉魚門徑)」。

入面條路比較力窄，多死車。轉到入去再打燈左轉，見到有車出緊黎，用左你要行既線，就停喺讓路位比佢過左先。

(14)做完窄路掉頭，沿住條路行出去時，考牌官示意「左轉出番大路」。未轉到的士站之前，可能有d死車block左行緊個條線，咁就要打右燈望鏡擰頭扭軚過死車。除左過死車，其他時間唔可以掂到白影位。過緊的士站打左燈，過完就望鏡擰頭扭軚去左線，繼續左燈，轉左後多數有一排死車喺左邊，有就打右燈，望鏡擰頭扭軚過死車(記住！記住！記住！擰完頭先好扭軚)。考牌官示意「前面路口右轉(入仁宇圍)」。打右燈，對面線冇車黎緊就慢慢右轉，有車黎緊就等佢過左先右轉。轉左入仁宇圍記住跟番自己條左線繼續慢行(不時有人行左出黎)。考牌官示意「前面路口左轉再左轉」。打左燈，就到路口扭少少軚，停喺讓路位時車頭要向住廢鐵場方向。左右兩邊都要望，如視線被block就趷下趷下出去睇。睇清楚冇車就左轉，然後轉二波。再打左燈，印少少brake左轉入崇信街，左轉既時候望一望右邊(倔頭路黎，但都係下有冇車黎緊)。情況許可就轉一轉三波再轉番二波，停喺燈位(呢個燈位多數都要停)。再開車時一波轉二波轉三波，臨到上斜左彎轉番二波，轉完彎考牌官會示意某個位置停低做斜路起步，例如「水龍頭停低」或「停喺架貨車後面」。打左燈望鏡擰頭扭軚，踩極力子踩brake停埋一邊，拉手掣，入空波。

(15) 大約到巴士站咁上下，考牌官示意「迴旋處轉番入試場」。繼續行番右線，見到安全島d人唔行出黎，就定住油門過安全島，跟住就係迴旋處。

就到迴旋處打右燈，減慢車速。如clear就可定住油門行入迴旋處。如半個迴旋處有車，就要停低(推一波，搵磨擦點，記住千祈唔好出左界)，等到clear再入迴旋處。入既時候望一望右邊，睇下有冇車埋黎。入左迴旋處就即刻打左燈搵機會拎番左線(外圈)。由於迴旋處係順時針，架車一路右轉，盞左燈會熄幾次，要keep住打番着佢。行左半個迴旋處就望鏡擰頭扭過左線(架車要入多d左線)。

*開車、停車︰望完左中右鏡先好鬆手掣。

*死火︰即刻踩住個brake，拉手掣，入空波，放晒腳，再撻匙開車。

*考牌官示意考試完畢︰踩極力子踩brake停車，拉手掣，入空波，熄匙(向左擰)，再入適合既波檔。停車位係上斜或平路既話，就入一波。停車位係落斜既話，就入後波(R波)。