發生mash

2015年05月26日(星期二) 【油塘一小小小段考試路線試走】 15:00@觀塘佳廉道上車

今日都係一上車就坐司機位，由觀塘佳廉道既U-turn位出發，去左某個斜路練習上次教既三手軚調頭。極力子仍然控制得唔好，踩得太深會溜後，放得太高又向前衝。如果想齋踩極力唔踩brake唔拉手掣而hold住架車唔郁，個極力子就要踩得好準，個臨界點可能高1mm架車就會向前或者向後郁。

我問師父三手軚調頭有冇時間限制，師父話唔好太慢。三分鐘？「三分鐘都算有d慢架喇，兩分鐘內啦」。其實我三手軚調頭一次應該都唔洗兩分鐘，但係極力子同brake控制得唔好，成日都會出現「一放少少brake車就行得太快，但軚盤就扭唔切」既情況。如果做完step2向後之後，架車唔係少少向右，而係右左既，基本上會唔夠位轉番出去，會上膊。

如果做完step2係perpendicular to馬路既，都好risky。呢個時候想補救既，就hold住架車唔郁(或者郁超級超級少，少到好似蝸牛行路咁慢)，軚盤向右扭到盡，咁既話就會夠位出番去。但係師父話冇咩都唔好用呢個方法扭死軚。練左三次三手軚調頭之後就出左去真馬路度行(其實所有馬路都係真既，只係頭幾次練習既馬路冇咩車，宜家就開始要喺車來車往既馬路行走，感覺好「真馬路」-_-)，去左油塘練習。

油塘有三條考試路線，師父話今日淨係練其中一條路線既其中一段最容易既部分(ummmm都唔易既T_T)。呢段路時而上斜時而平路時而落斜，仲有幾個安全島同一d頗為難轉既彎位。一開始我喺某個上斜位行緊，有超多死車(即係短時間內唔會開車既車)，我要不停重複「見到左邊有死車，打右燈，望鏡擰頭扭軚轉右。過緊死車，打左燈。同死車平排，望鏡擰頭扭軚轉左」呢一連串既動作。我既「望鏡擰頭扭軚」除左好唔自然，仲成日唔啱timing啊嗚嗚，成日擰頭擰得太耐，又或者擰完幾秒先扭軚。正確係擰頭只係擰一擰就要扭軚。同埋過死車時，未過完死車都唔好望鏡擰頭住，要平排架死車先好望，timing唔啱都係會肥！

雖然話係上堂新學姐，但都有d擔心。同埋d安全島真係有好多人-_- 不過師父話揸車期間安全島唔洗讓，除非有人衝出黎，但斑馬線就要讓。

跟住上斜時去到某個位，師父話「過左讓路牌(定唔知停車牌？)停低」，原來考試時考官都會要你喺差唔多位置停低。咁啱我要停既位置前面有架的士，停低後同前車要有兩個車位既距離，最少最少都要有個半車位，而我停車既位置後面咁啱係雙黃線，呢個時候，個priority就係前車距離，如果同前車距離要有兩個車位會令你掂到雙黃線，都冇咩所謂，但就唔好太誇張。考官通常會指示「過左讓路牌喺適當位置停低」同埋「適當既時候就開車」，咩係「適當」就要自行判斷。

我停左喺個「讓路牌」位幾次，其中一次，想出車時超多車上緊斜，我本身打左燈，但原來如果有排未出得就唔好打燈住，唔係後面d車唔知你出定唔出。所以，停埋一邊(已拉手掣轉空波)，要再出番車就入一波搵左磨擦點先，左手擺定喺手掣，望下出唔出得車，見到情況許可，就打燈、鬆手掣、望鏡擰頭，扭出去。又有一次，想出車時後面有架考試車(有人考緊1型貨車)，師父話等佢過左先，果然，架考試車向前行左少少，過左停左車既我同我前面架的士就停埋一邊，但佢剷左上膊T^T，我呆左，師父話都肥得好徹底。「轉彎位置不正確都話可以拗下吖，上膊冇架喇」，考試車上個位考緊試既仁兄可能喊左出黎。

呢段路黎講，喺個「讓路牌」出車之後，就會上斜、平路、落斜，其間都有轉左彎、右彎、S彎，軚盤唔好扭得太早、或者太多、太少，要自己預番個角度。扭到夠就hold住，咁上下先轉番直個軚盤。上斜差唔多上到最高時，就有個燈位，燈位後就係兩條路變一條路，呢個時候基本上唔洗停，因為個條路既設計係一邊綠燈，另一邊就紅燈。但都要打右燈做番望鏡擰頭先出車。出車之後就落斜，車速keep住25-30km/h，注意上斜、落斜、平路踩油既力都唔同，要自己調較番。

落到差唔多地面，有個難度頗高既落斜左轉，呢個moment要踩少少brake等架車減速，轉完個左彎就到燈位。幾時準備開車就睇左前方既行人綠燈，行人綠燈眨緊就可以get ready(入一波，搵磨擦點，左手擺定喺手掣)，開車就轉左，轉左後就係一條平路既直路，呢個moment，就一波轉二波、二波轉三波。呢個位會有小巴上落客，記住唔可以扒佢地頭，一定要跟喺佢地後面，因為佢地係生車(即係停好短時間，好快會開番車既車)。

考試個陣考官係唔會同你講幾時轉波、轉咩波、行邊條線，佢只會講「路口轉左」、「適當位置停低」之類既野。所以，你要自行判斷幾時轉波、轉咩波同行邊條線。師父話最好背左d考試路線，同埋油塘得幾個位置要轉三波(冇轉既話會肥，因為考自動波既會喺個d位置自己轉三波，棍波就要自己醒扒喇)，要記一記。

今日行左好多個迴旋處，準備入迴旋處既車係一定要讓喺迴旋處入面行緊既車。所以每次都一d有車行緊既迴旋處，都要停一停，望下右邊d車，make sure情況許可先可以行。如果個迴旋處係冇車既，就只需要減速少少，望下右邊，就可以直接駛入迴旋處。同埋每次一轉線都要望鏡擰頭先好扭軚，動作要連貫d、自然d。