發生mash

2015年06月14日(星期日) 【泊位及油塘考試路段A試走】 15:30@太子B1出口上車

本來師父約左前日下晝3點，但我點半出門時聽到師父個留言，原來搞錯時間要cancel，好彩我未出門口^_^ 師父跟住話喺太子上車，比多15分鐘我揸去油塘。咁好機會，應該lur飯應既，但我真係冇乜信心。旺角人多車多，我又揸得非常之咁麻麻…同師父講驚搞唔掂，佢話「放心，我會睇住我架車架喇」。(咦？點解有躺著也中槍既感覺？師父，你係咪串緊我揸車令你架車陷入危險?_?) anyway，咁好啦，太子就太子啦，接受挑戰^_^

今日開車去油塘途中，右轉入左一條路仔學泊車。首先講下個parking位既setting。個parking位喺左手邊，係一個白色框長方形，車尾位連住一個黃色框扁長方形，個扁長方形入面中間位有個「G」字，而白色框長方形右上角既前方有個雪糕筒，雪糕筒下面有條黃色線。泊車要記住三樣野。第一樣係雪糕筒下面條黃色線，第二樣係黃色框扁長方形入面個「G」字，第三樣係個泊車位右手邊條線。

首先，架車會停喺parking位後少少既地方，考官話可以開始泊車，就慢慢向前開，車尾過左個雪糕筒(睇左鏡)，就停車(踩極力子，踩brake，拉手掣，入空波)。呢個係get set位置，跟住就可以開始泊車程序。首先打左燈，踩盡極力子，入後波(「R」波)，搵磨擦點同時踩住個brake，望下兩邊同後面，clear就鬆手掣，慢慢放brake，架車會慢慢向後郁。呢個moment可以踩少少油，但記住記住記住，唔！好！扭！軚！住！架車tun緊個陣要望住左鏡。當見到左邊車尾盞紅燈掂到(但唔好過)雪糕筒下面條黃色線，就停一停先，再軚盤向左扭到盡(注意架車仍然要好慢好慢)，然後望住右鏡。當見到全個「G」字出左黎，就停一停先，再慢慢郁既同時個軚要向右回兩圈，然後繼續向後tun。當右邊車尾盞燈啱啱好過左parking位右邊條界，就軚盤向右扭到盡，然後要望晒三塊鏡。左前方塊鏡係睇cover到個「G」字未，左鏡同右鏡就係睇車身係咪parallel to個泊車位。到咁上下(即係見到個「G」字)，就睇下兩邊parallel未，可能會出現兩個情況︰第一，兩邊parallel左但未到個「G」字。此時，個軚要向左回兩圈(呢個moment唔洗諗回幾多，一係唔回，一回就係兩圈)，令車轆向番正，繼續tun到cover到大半個「G」字，然後停車。第二，兩邊仍未parallel。此時軚盤不需做任何動作，就咁繼續tun到cover到大半個「G」字，然後停車。

記住記住記住，入左後波(「R」波)之後，就唔可以再入其他波！同埋其實每次轉動作都唔係淨係望一邊鏡，要望幾塊(好似係…？次次落堂都唔記得左一半咁滯sosad v_v)，不過我淨係記得要重點望既鏡…。泊車停定之後，就再開車(記住打燈)。如果剛才停車時，個軚係回正左既，就要開得好慢好慢好慢，甚至扭死軚，將個軚向右扭到最盡，然後出車。如果剛才停車時，個軚係keep住向右扭盡既狀態，就可以就咁出車。無論點樣，出車都要望鏡擰頭。

喺個條路仔練習左幾次，次序係，泊車、開車、喺盡頭既U-turn位出番去條路、三手軚掉頭、泊車、開車…跟住就出番大路繼續前往油塘，去其中一個考試路段練習(哎呀！我認路真係太差太差喇，其實某d位黎過，甚至黎過幾次，都可以唔記得v_v)。次序唔係好記得，但做過以下既事︰轉入油塘個考試中心、行好多人既安全島、轉出泊左好多好多好多大貨櫃車(睇唔到左又睇唔到右)既大路、入roundabout(有時係掉頭、有時係轉左)、決定黃格前停定走過黃格(千萬不能停在黃格內！)、上斜位置停車及開車。

要記得記得記得，入roundabout基本上唔洗點睇左邊，因為d車喺你既右邊黎！望實右邊，抓緊機會就出車。

要記得記得記得，安全島d人啱啱好過完你架車過到會fail，因為可能有人會行行下跌倒或者執野或者行番轉頭(Who knows what will happen?)，你會停唔切車，所以一定要有安全既距離。

最後喺觀塘佳廉道過左U-turn位落車，今次個U-turn位外圍全部都係車(洗唔洗停得咁刁鑽啊!_!)，不過都夠位轉番出去。落車行番去地鐵站個陣，膊頭酸酸地，右手痹痹地。望下右手，紅晒，再望下錶，原來我揸左兩個鐘車！新手揸車硬晒軑後遺症sosad。

印象中今次冇溜後，yeah！