發生mash

話說身邊有揸車經驗既親戚都同我講，車，係機器野，要定時定候郁下佢，除左冇咁易壞，更重要係間唔中郁下架車，可以幫架車叉電，咁架車就唔會因為太耐冇着而撻唔着。但由於之前hi過下，有少少陰影，唔敢出馬路。表姐夫同表哥都話，揸車，第一，要輕鬆。第二，要有信心。如果緊張既話，先唔好講遇到突發事會反應唔切，就算一般情況都都會硬晒軚，唔夠靈活。當然佢地都好強調，輕鬆唔等如求其，作為司機，都要關注好多野，除左前方，仲有隔離線、行人、小路出大路既車等等，但就千祈唔好淨係focus前面而忽略周圍。雖然揸車好大責任，不過佢地都叫我唔好比咁大壓力自己。而如果冇信心，就仲大鑊。佢地話冇信心就唔好出馬路，因為你坐得司機位，出得馬路，你就要handle到馬路上一切既情況。

我之前就一直都未有信心，有大概三、四星期，都係keep住一星期撻一、兩次車，撻住架車10至15分鐘，或者喺泊車個位好慢咁向前向後郁少少，然後熄匙。但後黎我諗，咁樣落去都唔係辦法，我比咁多次報考車牌、比學車錢(我都學左好多堂)、第二次考既錢，同補鐘錢，仲要買車、整車等等，就係為左可以一家人一齊去親戚屋企呀，或者放假出大埔墟食個早餐等等。如果我呢少少都克服唔到，以後點算？咁當然，我冇忘記過我上年六月頭對自己所許下既承諾，就係做個安全既駕駛者。

過左一段時間，我有番d信心。就郁多左少少。點郁就要先講下我屋企setting。我住村屋，屋企後面係一塊真.爛地(凹凸不平、又多泥多樹葉)，架車通常係個頭向住我屋企，以坐喺架車入面計，右方有條上斜路(夠一架車過，冇車泊)，向後4-5個車位既左方，就係條落斜路(入去個位窄，入到去就左方好多車泊，但仍有足夠一架車過既空間。唔入呢條落斜路，再向後多2個車位，就可以tun到出石屎路。以車頭向住石屎路黎計，佢係一條上斜路，左邊係停車場，但停車場出面都泊左幾架車，過左呢幾架車係左轉位，左轉完行多4-5個車位就出T字路口。呢個T字路口仍然未係馬路，只係一條疑似單線雙程路，疑似係因為某d位只夠一架車過，要適時讓路。喺T字路口左轉，行多4-5個車位，就有個足夠U-turn既area，過左呢個area再行多5-6個車位，就係好斜既落斜路，落晒斜路到馬路口，左轉去大埔方向，右轉去元朗方向。而去大埔方向，過兩個巴士站(即大約30秒車程)就到迴旋處。

好，講番點郁架車。第一次真正郁番架車，就係由泊車位，倒後少少，再向前上右邊條分岔，再倒後落番黎，再D波R波D波R波咁將車頭向屋企，變成車尾向屋企。第二次郁架車(個時架車車尾向屋企，車頭向石屎路)，就係向前出到石屎路，再D波R波D波R波咁180度掉轉架車，入番去條真.爛路，車頭向屋企咁泊番好架車。後來就進展成出T字路口個U-turn area U-turn架車再番屋企。U-turn左幾次，本來都好滿足，但表哥話我咁樣練習，就算日日練，練100次、1000次都唔會進步，一定要出馬路練先可以吸收路面經驗。

我思考左一陣、等待左一陣，到尋晚，覺得有信心，23:30想出去揸架車去迴旋處兜一個圈再番屋企，點知又落雨。諗諗下，微雨姐，都係照出，超短路程都叫有信心嘅。詳細車程就好似前文提及既路程咁，不過去到that U-turn area我都停左架車成分鐘，問清楚自己係咪okay，係咪handle到，咁我就再開車落斜路、出路口。夜晚冇乜車，我打左燈，到路口停左一停，見冇車就出，keep住行30+，去到迴旋處路口，又停，有兩架車行緊，等佢地過左就出。因冇咩車，我就喺外圈兜(個人認為有d慢，行around 30)，然後打左燈(對吧？)出迴旋處。其實出迴旋處冇耐(大概1-2秒)就有左方支路匯入(d車由高速公路唔經迴旋處咁落黎)，雖然我喺大路有優先權，但都有望下個路口有冇車。之後繼續行，到番番入屋企條好斜既上斜路，就打右燈，個馬路位呢個moment變左三條線，一條往元朗方向，一條往大埔方向，中間有條係for往元朗方向既車入呢個路口停既。我停喺個度，等幾架車過左，有足夠時間，我就右轉上斜路，然後番屋企泊番好架車(車頭向屋企)。

全程都安全既，只係過完迴旋處又未到右轉上斜路個個位，中間有一次時快時慢出現左，雖然唔係嚴重個隻，但跟喺我後面架車應該feel到少少chok，希望再控制得好d。呢個超短程對好多駕駛人士黎講都唔算係d咩，但我真係好開心好激動，一停番好架車(brake、P波、手制)就whatsapp比表姐夫講！但揸完之後反而有少少手震同腳震情況，點先可以改善呀v_v