發生mash

《小王子》(1943)︰「最重要嘅嘢肉眼係睇唔到嘅。」

一開始書局見到《小王子》出左廣東話版，完全冇買嘅意圖，以為廣東話用喺呢啲classic嘢會格格不入，但！我！錯！了！真係好好好好睇！

當中有啲句尾助語詞有些少突兀，部分句子唔太順，但可能係譯者特登噉譯去表達小朋友講嘢嘅模式掛。

Anyway真係好鍾意呢個版本嘅《小王子》︰

一，廣東話嘅盞鬼完完全全將小王子同埋飛機師嘅童心表達得淋漓盡致。

二，係我最過幾個版本入面最最明白嘅版本。

三，非常reader-friendly，有前言同好多footnotes，睇書時唔會阻住流暢度，但想知道得更多又可ref番。

除此之外，佢係香港人譯嘅廣東話版本，比起澳門人或者廣東人嘅譯本，更加地道，淨係心思已經好值得支持！！

***

摘錄

所有嘅大人最初都係細路仔，只不過佢哋好少人仲記得呢樣嘢唧。(p.13)

一
呢啲大人，自己成日乜都唔明；係都要啲細路仔解釋呢樣，解釋嗰樣，真係令人好攰。(p.17)

二
當整件事太撲朔迷離嘅時候，原來人係唔會夠膽反抗。(p.20)

四
因為佢着住一身土耳其嘅傳統服飾，所以完全冇人相信佢。啲大人成日都係噉。…而呢次佢着住一套好優雅嘅禮服。今次，大家都好同意佢嘅理據。(p.29)

六
「你知唔知呀？當一個人好唔開心嗰陣，就會愛上睇日落。」
「噉你睇左四十四次日落嗰日，係咪好唔開心？」
但係小王子並冇答到我。(p.39)

七
如果有人鍾意一朵花，一朵千千萬萬繁星上面獨一無二嘅花，噉只要抬頭仰望星空，佢就會覺得好開心。佢會同自己講︰「我朵花就喺呢個夜空嘅某處。」但如果綿羊仔食咗朵花，咁對佢嚟講，就會好似所有星光都突然熄滅一樣！我諗，都一樣係無關重要啦！(p.43)

八
你都千祈唔好聽啲花講嘢呀。你只可以望下佢哋，然後聞下佢哋嘅香氣。(p.47)
嗰陣時我咩都唔明！我應該從佢嘅行為而唔係說話去了解佢。(p.48)

九
其實只係因為佢唔想小王子見到佢嘅眼淚。佢就係一朵咁高傲嘅花。(p.52)

十
對於國王嚟講，個世界其實好簡單︰全世界嘅人都係子民。(p.54)
我哋只可以向其他人要求一啲佢哋能夠做到嘅嘢。權威要建立喺理性嘅基礎之上。(p.57)
你可以審判你自己吖。呢樣係最難做嘅事。審判自己比審判其他人難好多。如果你可以公正噉審判到自己，你就係一個真正嘅智者。(p.58)

十一
自大嘅人從來都只會聽到人哋嘅讚美。(p.61)

十三
國王並唔係「擁有」一切，佢哋只係「統治」。有好大分別。(p.67)
我擁有火山同埋花，對我座火山有用，對我朵花都有用。但係你對啲星星乜嘢用都冇。(p.69)

十四
乜嘢都唔使明。命令就係命令。(p.72)
粒行星一年轉得快過一年，但係個命令都冇改過！(p.73)
盡忠職守同想偷懶，其實係可以並存嘅。(p.74)
我反而覺得佢係惟一一個冇咁荒謬嘅人。或者係因為佢關心嘅嘢，並唔止係佢自己。(p.75)

十五
無論係活火山定死火山，對我哋嚟講都係同一樣嘢。對我哋嚟講重要嘅係有座山，呢樣嘢永遠都唔會改變。(p.79)

十七
佢哋以為自己需要佔用好多空間。佢哋以為自己好似猢猻樹一樣咁重要。所以你一定要叫佢哋自己計下條數。佢哋最鍾意就係數字㗎喇，計下數佢哋就最開心。(p.82)
「啲人喺邊度呀？喺沙漠上面有啲寂寞。」「就算喺人群之中都一樣會寂寞。」(p.84)

二十
如果佢見到，一定會嬲到震。佢一定會咳得好犀利，扮到好似就死噉，等自己唔使畀人笑到面都黃。而我就一定要煞有介事噉去照顧下佢。如果唔係，佢就一定會為咗激我，真係走去自尋短見。(p.91)

二十一
「『馴服』即係乜嘢意思呀？」「一樣經常畀人遺忘嘅嘢。就係『建立關係』噉解。」「建立關係？」「冇錯。對我嚟講，你仲只係一個細路仔，就好似其他千千萬萬嘅細路仔一樣。我並唔需要你；而調返轉頭，你亦都唔需要我。對你嚟講，我只係同其他千千萬萬隻狐狸一樣嘅一隻狐狸。但係如果你馴服我，噉我哋就會彼此需要對方。對我嚟講，你將會係世上獨一無二。對你嚟講，我將會係世上獨一無二。(p.94)
「唔該你，馴服我吖！」「我都好想，但係我冇咩時間，我有好多朋友要去認識，有好多嘢要去理解。」「我哋只能夠理解到我哋馴服咗嘅嘢。人類已經唔再有時間去理解任何嘢，佢哋所有嘢都係去舖頭度現成買返嚟。但係世上冇舖頭可以買到朋友，所以佢哋唔再擁有朋友。如果你想有一個朋友，馴服我吖。」(p.95-96)
說話係誤會嘅源頭。(p.97)
「如果你每日都係下晝四點嚟嘅話，噉去到三點鐘我就會開始覺得開心。時間愈近，我會愈開心。到咗四點，我就會既焦慮又擔心，我會發現開心係有佢嘅代價㗎！但係如果你鍾意幾時嚟就幾時嚟，我永遠都唔會知道應該咩時候去準備好我嘅心情…呢個儀式一定要有。」「『儀式』即係乜嘢意思？」「另一樣經常畀人遺忘嘅嘢。佢就係令到某一日同其他日子唔同，某一個鐘頭同其他時間唔同嘅嘢。」(p.97)
我會耐心聆聽嘅，就係佢，無論佢係發緊牢騷，定係自吹自擂，又甚至乎只係粒聲唔出。因為佢先至係我嘅玫瑰花。(p.99)
只有用心先至可以睇得清楚。最重要嘅嘢都係無形於雙眼。(p.99)
令你朵玫瑰花變得咁重要嘅，係你花喺你朵玫瑰花度嘅時間。(p.100)
你永遠要對你馴服咗嘅嘢負責。(p.100)

二十二
「佢哋唔滿意自己原本嘅地方咩？」「係人都唔滿意自己所在嘅地方㗎啦。」(p.101-102)
「只有細路仔先至知道佢哋搵緊啲乜嘢。」「佢哋真係好彩。」(p.102)

二十四
我唔明佢喺度講乜，但係我冇出聲。我知道問佢都係冇用。(p.106)
我所見到嘅只不過係一個軀殼，最重要嘅嘢肉眼係睇唔到嘅。(p.108)

二十五
啲人係都要逼上架特快列車，但係佢地已經唔知道自己喺度追尋緊啲乜嘢。然後佢地頻頻撲撲噉，不停喺度兜圏。真係好唔值得。(p.109)
用眼咩都唔會睇得到，一定要用個心去搵。(p.112)
如果你容許自己畀人馴服，你就要冒一個可能要流眼淚嘅險。(p.114)

二十六
所有星星都係沉默嘅。你所擁有嘅星星，同其他任何人嘅都唔同。(p.121)
*