close
【學車手記】 2015.10.09 忠義街路試合格 (考大圈，佛光街)
棍波輕型貨車，丙部試，合格。(終於！)
細剔8個(輕微)︰
【開行】 21. 未有查看交通情況
【停車】 23. 未有查看交
【停車】 25. 停車位置不正確
【訊號的使用】 38. 未能及時發出訊號 (上次兩小剔，今次一小剔)
【駕駛技術】 44. 未能選用適當波檔
【駕駛技術】 48. 未能充分使用駕駛鏡
【控制方面】 53. 油門控制不當
【控制方面】 54. 離合器控制不當 (上次兩小剔，今次一小剔)
【路口】 59. 轉彎時位置不正確
黃色highlight是兩次都犯了的錯誤
最值得開心既係，今次冇
【駕駛意識】 31. 太接近其他物體
【駕駛意識】 32. 未能在適當行車線上行駛 (以前真係成日出界-_-)
【駕駛技術】 47. 警覺性及判斷力弱 (上次兩小剔)
上次考油塘，第一次考literally緊張到腳震，極力子、brake、油門都控制得差(震到咁都好難定得住…)，加上冇乜駕駛天分，肥佬都好合理。
今次考15:40，師父約左13:45九龍塘上車。忠義街平日呢d時間學神止步，就去左九龍塘練習。今次唔洗考丙部，唔洗泊車、窄路掉頭同斜波起步，所以主要都係兜下圈，練下點出路口同轉彎。練到咁上下，見個天陰陰地，就問多次師父點樣開水撥(平時就算落雨都係師父開，我好少掂，驚到時唔記得點開)。差唔多15:00，就換番位，師父車我入忠義街，諗住行下兩條考試路線。但原來呢個時間九龍塘都幾塞車，各位考差唔多時間既朋友最好再預鬆少少啦。
塞一塞車，時間唔算好充裕，所以一入到忠義街考試路線範圍，師父就即刻帶我兜兩次細圈(即係迦密村街，入消防局、經常一邊滿晒死車個度)同一次大圈(即係佛光街)，之後就直接番試場。
我地15:23上到考試中心條斜路，個頂已經滿晒等考試既車。師父照舊叫我去左洗手間先考試，但我已經緊張到唔想去，就直接拎住身份證、學牌、排期信入考試中心報到(落緊微微雨，開左水撥)。(今次落車冇腳痹!_! yeah!) 職員登記完，就拎番身份證、學牌，同兩塊「駕駛考試」鐵牌番上車。
同上次一樣，
上到車師父已經將
一切所需文件都擺好左。等左陣，工作人員叫我地移動去指定地方等開波(架車停左喺考試中心隔離，車頭向下，落斜方向)，幾分鐘後
考牌官就到。今次個考牌官冇戴超，可能今日比較陰天啦。今次個考牌官都係感覺唔惡，不過有少少cool。
一上車，
我︰Hello呀sir。
考牌官︰你好。請講出你個名吖。
我講完佢就寫左陣野。我見望住佢好似唔係咁禮貌，就開始
鄧鏡波︰較凳、郁鏡、check空波，不過考牌官低頭寫緊野，唔sure佢睇唔睇到。所以，當佢抬頭叫我讀完廿三米車牌，再同我講「準備好就可以開車」，我就再快手求其鄧鏡波多一次。
Get ready就入一波，邊印brake邊搵定磨擦點(落斜，磨擦點唔洗咁高)，望晒左中右鏡同左右盲點，clear就打右燈，再望一次所有鏡同盲點，就鬆手制出車。前面大概三、四架車位有死車，我繼續印住brake慢慢行，同時望右鏡擰頭，clear就扭軚過死車(千萬千萬千萬要記住！擰左頭先好扭軚，千祈唔好同時擰頭加扭軚！肥硬！)，跟住慢慢放brake同極力子，順手轉二波(落斜轉波真係容易d、順暢d)，過晒死車就打左燈靠番埋左邊自己條線(過死車時係用緊對頭車既線)。
差唔多到路口，考牌官話「路口轉右」，就打右燈，停喺路口，推一波，望下左邊有冇車(雖然得左邊會有車黎，但我都有望下右邊)，clear就慢慢放brake，右轉入
孝民街(右邊線)，但右轉時仍keep住少少brake，因之前練呢個位成日都轉唔切出左少少界落斜，完全轉晒彎就轉二波。前面有幾部死車，就打左燈、望鏡、擰頭、扭軚，行兩條線既中間(因兩邊都有死車，不過條路算闊，行中間都夠位。就算冇死車，都記得唔好挨太埋右邊d電單車)。
過晒死車就打右燈、望鏡、擰頭、扭軚，番番右邊線(右邊有個停車場
口，行過時擰頭望一望)。因前方都好暢通，就順手轉堆三波。
成條路都係落斜，加上地下寫住「慢駛」，所以轉完三波都冇乜特別比油，只係定住油門行(大約30km/h)。
差唔多到好多小巴停既位，就印brake放慢轉番二波(因要預番可能有人喺d小巴之間走出黎)。慢慢咁過左右邊個路口(都係擰頭望一望啦，唔知會唔會有車標出黎，逢過路口都望一望就好d)，就比番少少油。
之後就到
斑馬線(小心唔好hi到左右d Z型線)。之前考油塘冇斑馬線，但忠義街都okay多斑馬線，記住記住，安全島有人等緊都唔洗停低讓人過，但斑馬線就要，呀路人甲差兩步行到都要停低比佢過。
差唔多到個陣見到有人準備過，就印brake放慢(當係比個signal人，話比佢知「宜家我停喇，你地過馬路啦」)，再停低，推一波，等佢地完全過晒再開車(基本上，冇特別講既話，我都係一波起步後一、兩秒就轉二波)。
一路繼續落斜，考牌官話「路口轉右」，我打右燈，到讓路位就停低，推一波，望左望右睇下有冇機會出去(同考試中心落孝民街唔同，呢個路口兩邊都有車黎
)。我可能錯過左一個機會(聽到考牌官輕輕嘆左口氣)，不過等多陣，左邊d車過晒，右邊架巴士又開出，我就鬆brake鬆極力子出車右轉入
忠孝街。出緊個陣望左兩次左邊，有架車黎緊，不過唔算近。轉晒彎就轉二波繼續行。過巴士站時有架電單車死車，雖然停得好近行人路，但嚴格黎講佢喺馬路上面，我就打右燈、望鏡、擰頭、輕微扭軚過佢，再打左燈、望鏡、擰頭、扭軚行番自己條線既中間。過完巴士站左邊有個路口，就行到時都望一望。然後有個安全島，有人企左喺安全島，但無意踏出馬路，我就keep住速度，繼續行。
前面有旅遊巴死車，suppose要打右燈、望鏡、擰頭、扭軚過佢，但迎面有架貨車行緊，我就停左喺架死車後面，我佢過晒我再做過死車既步驟，hi住右邊線行。(其實我覺得架車停低時同架死車有d近，應該可以早d停比多d距離。) 過完死車再打左燈、望鏡、擰頭、扭軚番番中間繼續行，經過左邊個路口望一望，順手打右燈、望鏡、擰頭、輕微扭軚轉線，跟住就到紅綠燈位。
*****此為分隔線*****
**無論係大圈(佛光街)定細圈(迦密村街)，以上路線(直至呢個紅綠燈位)都係一樣。**
**考佛光街，燈位直去。考迦密村街，燈位右轉。**
去到燈位時紅燈，停左車考牌官都冇講野，轉綠燈我就自動直去。差唔多到頂(一路都係上斜)就係燈位。考牌官話「過左燈位轉右」，我打右燈，接近燈位時轉左黃燈，我就停車拉手掣入空波。見到黃燈到停車距離比較短(大概係一個半箭咀位)，所以都停得有d急，架車有少少chok。
呢個燈位比較耐，我得閒就望下左中右鏡，然後發現雨唔知幾時停左，我就扮晒好自然咁熄左個水撥(唉，都唔知停左雨幾耐-_-)。平時如果一開車就轉彎，我多數都係轉晒彎先轉波，不過呢個彎大d，所以我開車後一邊轉彎一邊轉二波。右轉入佛光街既時候靠右線，其實轉完右都見到個紅綠燈，我見紅燈就變油，慢慢停低。一停車佢就轉紅黃燈，我即刻推番一波開車，仲上緊少少斜，我就比少少油轉二波。
轉左波冇耐就開始落斜，我行慢左少少。考牌官話「燈位轉右」，本身行緊個條線會分做兩條線，一條直去一條右轉。一見到個分隔線就打右燈、望鏡、擰頭、扭軚轉線。右燈唔熄住，反正都係要右轉。
換完線正常應該係紅綠燈位，淨係着住綠燈個陣，如果對面行車線冇車就可以直接轉彎，如果對面行車線有車，就停喺布袋位，等d對面線d車過晒，先可以過，又或者等綠色右箭咀燈着就可以過(綠色右箭咀燈着，代表對面行車線係紅燈)。但考試個陣紅綠燈壞左，有個交通警拍揮，我停低等佢揮手叫我行，點知我一停佢就揮手，我個陣拉緊手掣，就快快手拉埋，再重新做開車動作。個人認為人手指揮仲容易，因為唔洗睇對面線d車。
呢個彎係落斜彎，所以印住brake轉。完全轉晒彎入忠孝街之後再轉二波，行左一陣就左轉，見到前面都好暢順，就轉三波。條路係落斜再上斜，考個陣修緊路，喺差唔多落晒斜轉上斜既最低位有紅綠燈。我差唔多到紅綠燈(此時紅燈)就brake住轉番二波再停車拉手掣入空波。
之後一路行就到巴士站右邊有d唔記得水馬定雪糕筒，就望一望右行過佢地，經過巴士站又望一望左。跟住考牌官話「前面轉右」(個陣差唔多到安全島)，我打右燈、望鏡、擰頭，扭軚行右邊線(又係d一分為二號既行車線)，到讓路位就停低推一波。
等到對面線d車行晒，我就開車右轉入孝文街。練習時轉呢個彎位成日都轉得太開，有時右邊直情成部車都過到，有次仲有架電單車攝位，有少少危險。所以記住，右轉時都靠右少少，盡量唔好比其他車攝出黎。
轉彎後再打右燈、望鏡、擰頭，輕微扭軚靠右。再打右燈準備右轉入忠義街，上番考試中心。考牌官話「去到最前面停低」，前面有幾架死車，我就打右燈、望鏡、擰頭，扭軚過死車，再打左燈、望鏡、擰頭，扭軚番番原來條線。考牌官「雪糕筒停低」，我打左燈、望鏡、擰頭，扭軚過番左邊，停車拉手掣入空波。考牌官話「考試完畢」，我熄匙，入一波(因停車位置係上斜)。佢睇住我做完成個動作，就同我講左幾句野，
考牌官︰你上次考邊？
我︰(少少震驚，下？唔係掛，點解會知我唔係第一次考既？) 呃…油塘。
考牌官︰拿，你頭先有三次開車前冇望鏡。
我︰(唉，睇黎又衰左…) 係，係。
考牌官︰其實十次倒有三次冇望已經可以肥你架啦。 (唉呀，又要洗多幾千嗚嗚) 不過，見你揸得幾好，就剔個細剔算啦。
我︰哦，唔該，唔該呀sir。(仲未知合唔合格，繼續顫顫驚驚。)
考牌官︰你陣間落車睇成績啦。
我︰係，唔該呀sir。
跟住考牌官落左車，師父就走埋黎叫我落車睇成績。入到考試中心等左陣就收到黃紙。其實等緊個陣都有少少希望架喇，因為上次fail，唔洗半分鐘就拎住黃紙出番黎。不過都唔敢開心住，費事希望愈大，失望愈大。到真係拎到黃紙，一望，見到合格，心情都有d複雜。一方面好開心忍唔住笑，另一方面又覺得好唔真實。
今次同上次好唔同。上次個考牌官開聲話左我兩次，一路上都有寫黃紙。今次個考牌官除左比必要既路試指示，就冇再開過口(所以佢落車前同我講咁多野，都幾surprised)，而且成程都唔見佢寫黃紙(可能我掛住揸車，望唔到佢寫…)。
雖然係暫准駕照，但都表示左我可以獨立行車，唔洗師父傍住。呢個係好大既責任，所以都同師父講定，會繼續搵佢操下鐘。車就未買，想買部兩萬樓下，作練習用，唔洗靚唔洗快架，最緊要全部零件運作正常！希望練習多d，快d可以投入大埔街坊泥鯭服務下啦^_^
文章標籤
全站熱搜
留言列表
