發生mash

棍波輕型貨車，乙部試及格，丙部試不及格。

大剔3個(嚴重)︰
【停車】 23 未有查看交通情況
【駕駛意識】 27 轉換行車線前未有查看交通情況
【駕駛意識】 34 不顧及其他道路使用者

細剔16個(輕微)︰
【倒後及停泊】 15 泊車位置不正確
【停車】 25 停車位置不正確
【駕駛意識】 31 太接近其他物體
【駕駛意識】 32 未能在適當行車線上行駛
【速度控制】 36 未能調整車速以適應交通情況 x2
【訊號的使用】 38 未能及時發出訊號
【駕駛技術】 44 未能選用適當波檔
【駕駛技術】 47 警覺性及判斷力弱 x2
【駕駛技術】 48 未能充分使用駕駛鏡
【控制方面】 53 油門控制不當
【控制方面】 54 離合器控制不當 x2
【控制方面】 55 軚盤控制不當 x2

我考15:30，師父約左13:30觀塘上車。去左麗港城商場附近既斜路練左兩次三手軚掉頭同泊車就去試場。去到油塘三條線都有行過，行到15:00，本身想喺嘉榮街停低等考試，但實在太多車喇，一連有三、四架考試車，見冇位停就兜多陣，15:10先番考試中心，師父叫我落車去個洗手間先，再去報到。

我一落車就feel到手腳都有少少痹，可能係揸唔慣咁耐車，平時揸個半鐘就啱啱好，有次揸左差唔多兩個鐘，真係手都痹埋。(不過唔合格唔關手痹事，而係判斷力弱。)

報到只需大概一分鐘，拎住身份證、學牌、排期信，行入考試中心，比職員登記，然後佢就會比番身份證同學牌你，叫你喺地下個架拎兩塊寫住「駕駛考試」既鐵牌出番去等。我拎完之後出左去比師父掛，我就坐左上車等考牌官(架車停左喺parking位右邊後少少既位置)。上到車見到師父已經set好架步，一切所需文件都擺左喺司機位同師傅位中間個平台到，仲擺得好整齊^_^ 師父開左幾次車門提我考完要熄匙入一波，過左冇耐考牌官就到。

同其他考牌官一樣，佢都係戴住副超，不過感覺唔惡。一上車佢就用溫柔既聲線講「你好」，同埋問我叫咩名，我講完「哈佬呀sir」，答完自己個名之後，佢循例講左幾句考試程序，問我有冇問題，我一路答冇，一路順手鄧鏡波︰扮野較下張凳、郁下塊鏡、check下空波(其實係考牌官黎之前已經set好晒，唔洗特別再較，但都要做樣比佢睇到你開車前有準備)。

開始考試，考牌官叫我讀前面架van仔既車牌(比想像中近，應該二十米都冇)，答完佢就話「宜家可以開始泊位」，我入一波，搵磨擦點(此時我feel到自己腳震)，望中鏡、左右鏡、左右盲點，鬆手制，慢慢放極力子，架車慢慢向前行(前方有架停低左既van仔)，我印住個brake，架車慢落黎，再踩盡極力子停車，拉手掣，入空波。深呼吸一下之後，我入後波(R波)，搵磨擦點同時踩住個brake(仍然非常腳震)，望左右鏡及左右盲點，望中鏡，再望右鏡及盲點，擰頭望後面，鬆手制，架車慢慢向後，然後做番平時既泊車步驟，今次兩邊平行時cover到小半個G字，我就冇回軚，就咁再後多少少，踩番深d個brake，又望下左中右鏡(望左鏡時見到師父望住我泊位，心諗師父呀，如果你喺車上就好喇，我都冇咁驚)。考牌官問我「係咪泊好喇？」，我聽唔到(此時我準備拉手掣)，「下」左一聲，佢再講多次，我話「係呀」，然後架車就死左火。我當堂嚇左跳，心諗唔係掛，一開波就死火？兩秒後我回神，但都仲有少少亂，我伸手摸手掣，又縮番，踩實個brake，再拉手掣，check空波，放晒brake同極力子，撻匙，架車着番。

跟住考牌官話「準備好就可以開車」，我入一波，搵磨擦點，望左右鏡、左右盲點，中鏡，打右燈，再右鏡擰頭，鬆手制，扭軚，慢慢放極力子，過左轉彎位就轉二波(此時喺嘉榮街落緊斜)。考牌官話「前面轉右再轉右」，我印住brake出到讓路位，前面有兩架車，我就停低推一波吊住極力子等佢地行。佢地行完，我放少少brake出到雙虛線前停低，醒起未打右燈，就不着行跡咁打番，望下左邊冇車先出，出個陣一路回頭望同時扭右軚行入欣榮街(感覺上扭遲左少少，不過應該影響不大)，右邊有死車，我踩住少少線行，就到最後一架死車前我打右燈，過緊佢就望鏡擰頭，扭番右少少行番條線既中間。

到左欣榮街轉右入茶果嶺道既讓路位，我又印住個brake慢慢停低(前面有一架車)。等前面架車出左去(其實等左okay耐，早知就拉手掣啦)，我就向前行到路口位，再踩brake停低，望左望右睇有冇車，左右都clear準備開車，就見到左前方本來停泊喺路邊既van仔打燈想開車，我就唔去住，睇定d先。架van仔真係開車，等佢走左，我再望左望右睇有冇車，然後慢慢出，出到一半我加快左少少(仍然一波)，費事喺路中間咁耐，然後扭軚轉右，完全轉晒彎入晒條線，我就比多d油轉二波。

行左一陣見到前面okay多車(未到黃格，交通燈為紅燈)，我慢慢停車，拉手掣。呢個時候燈位轉紅黃燈，同時考牌官話「前面燈位右轉」，我拿拿臨入空波再入一波，搵磨擦點，望左右鏡，鬆手掣，開車。架車慢慢落斜，我冇乜比油，轉左二波，定住油門過燈位，轉完右考牌官話「陣間迴旋處轉左」，我打左燈，過左雙白線就望鏡擰頭扭去左線，經過安全島時亦都係定住油門，之後再打左燈，停喺雙虛線，再推一波吊極力子，咁啱半個迴旋處都冇車，我就入迴旋處，一出迴旋處我就打右燈準備拎番右線，望中鏡有車，望右鏡都有車，直行(鯉魚門道)一陣再望中鏡冇車，望右鏡擰頭，扭軚過右線，然後轉二波，過埋第一個燈位轉三波。行緊條直路時間中望下左中右鏡，就到燈位時轉番二波，考牌官話「燈位轉右」，我慢慢停車(前面有兩架車)，拉手掣，入空波，望下左中右鏡，打右燈。轉紅黃燈我就ready一波，望左(中?)右鏡，鬆手掣開車，行左兩秒倒就轉二波，轉完先行上斜既右灣。

上緊斜(高超道)就到窄路掉頭個位，考牌官叫我停埋一邊，我「下」左一聲，心諗唔係掛，唔通叫我落車？考牌官就講多次「係呀，停埋一邊吖，做斜路開車」，因為平時練呢條線好多時都係做完窄路掉頭出番黎先做斜路起步，所以叫我喺呢個位置停有少少反應唔切，好彩最後都順利停車兼開番車，冇溜後，冇死火。又係入一波，吊極力子(高少少)，打右燈，望中鏡右鏡盲點，鬆手掣開車。考牌官可能係睇中左冇車上黎先叫我喺呢個位停車掛，因為我由停車到開番車成個斜路起步既過程都okay快，冇咩車走上黎。

一開車考牌官話「前面路口轉右」，我轉左二波，打左燈，行多陣就印住少少brake左轉入高超徑。考牌官話「喺適當位置停低做三手軚掉頭」，我停得前左少少(比我想停既位置再前多一個欄杆位)，停車拉手掣入空波。輕輕抖左啖氣之後就開始，成個過程都算順利，架車冇行得太快，亦都冇chok下chok下，第三手轉左大半，我仍然印住個brake(好驚出界呀，之前練習間唔中都會回唔切軚過左隔離線)，快快手回軚(考牌官話「出路口轉左」)，架車直番之後，我就停喺讓路位，打左燈，諗住推番一波，點知原來本身係一波，我就掂一掂支波棍就吊極力子等出番大路。

未左轉已經見到有死車，所以一左轉就打右燈，望鏡擰頭扭軚。大鑊既事情發生鳥。考牌官以略為激動又或者係激氣(但仍算溫柔)既語氣同我講「擰完頭先扭軚呀，小心d吖嘛，睇清楚d吖嘛。」我就知道我肥硬。不過知道自己會肥之後反而冇咁緊張，冇咁腳震。我仍然冷靜咁聽從考牌官指示，打算安安全全咁番番去試場。

轉左二波，考牌官話「過左燈位右轉」(個陣紅燈，前面有兩架車)，我停低，拉手掣，入空波，轉紅黃燈，ready一波，望下兩邊，鬆手掣開車，轉二波，過燈位，喺上斜差唔多最高點轉二波，印住少少brake落斜。另一件大鑊既事情又發生鳥。話說前面有好多死車，師父都提過我要慢慢黎，某一、兩個位係闊到一條線行到兩架車，個d位就算對面線有車行緊都可以慢慢咁過，唔洗停低。今次我啱啱由最高位落緊斜，見到前方有兩架小巴停左喺路邊(位置係左方小路(?)出入口前少少)，而對面線就有三架車行緊上黎，我印住個brake停低，停既位置唔小心block左入小路條線少少，我feel到停錯位，但正當我諗緊開唔開車好個陣，
考牌官就語帶激動咁出聲(feel到佢燥燥地但禁住道火)「你做咩停低呀？」
我低頭好細聲咁答「因為前面有車。」
佢「有車都唔係停喺呢個位呀(此時我後面架私家車攝左入我block緊個條小路入口，駛左入去)，你睇下人地架私家車點過？」
我「係…」
佢「專心d呀嘛，睇清楚d呀嘛。」
我「係，sorry。」

然後我開車，打右燈望鏡擰頭，過左兩架死車，打左燈望鏡擰頭，埋番線中間，轉二波，繼續落斜時同樣方法過左兩次死車，考牌官中途仍就頭先件事講左我幾句，我一直「係，係，係」，跟住佢話「迴旋處番試場」，我印住brake落迴該處，打左燈，停喺讓路位，推一波，吊極力子，見冇車就入，出左迴旋處就轉二波，慢慢轉左入欣榮街，收油，腳擺brake位，打右燈，慢駛轉右入嘉榮街，轉緊個彈見到有幾個人過緊馬路，就慢慢停車，推番一波，d人過晒就開車，過完多人位就轉二波，慢慢轉番入去對住考試中心條街。

考牌官話「喺右邊停低」(算好彩，直接停，喺左邊停又要轉番入去，複雜d)，我望左中右鏡，踩極力子踩brake，拉手掣，入空波。考牌官話「考試完畢」，我「下」左聲，佢再講多次，我熄匙(好彩記得向左扭)，入一波，佢睇住我做完成個動作，就一路落車一路同我講番考試中心睇成績。

考牌官一路比指示，我都有一路「okay」、「好」、「係」等回應。但最後唔記得左講「唔該呀sir」。雖然講唔講都唔會影響我唔合格既結果，但我唔係有心冇禮貌架v_v 跟住師父走埋黎叫我落車睇成績。入到去考試中心，職員叫我坐低，半分鐘後就比左成績我。我頭dup dup出番去搵師父，師父應該知道我唔合格，但冇黑面，淨係叫我上車先，開車時佢問我考試情況，我講左考牌官開聲話我個兩次比佢聽。之後佢喺藍田地鐵站放低我，仲whatsapp我話唔緊要，努力左就得。唉，師父咁比心機教我，我又令佢失望，仲要佢安慰番轉頭，你話點好意思？

雖然路試期間比考牌官話左兩次，但冇dup我brake，都算好彩。佢既提醒其實都係塞錢落我袋，如果可以詳細少少就好喇，我好想知「44未能選用適當波檔」係發生咩事。我唔會質疑考牌官既判斷，始終人地有多年路面經驗，只係我想知邊度需要改善…

黎緊又要報重考，又要補鐘，我諗草去歐洲筆錢都要用黎重考架喇。希望兩take可以pass啦，唔想師父又失望多次。